時局 (Patreon)

話說上個星期有個細嘅飛咗去白俄羅斯做採訪，佢事前同我交代晒啲嘢，不過當時我都覺得佢係唔應該係呢個時候去！因為危險性太大！

但係有自己理想嘅年輕人，我呢啲阿叔就真係唔好阻人發達啦！我只能夠叫佢定時定候報平安俾我！

佢成功入咗白俄羅斯，又冇好似其他國家記者咁俾人驅逐，又唔使隔離，我覺得已經贏咗！

咁琴日下晝我另外兩個細嘅記者，喺採訪旺角遊行嘅時候，又被無理拘留截查，其中一個記者仲要俾人拉咗去警局！搞咗一輪先放返，完全又係針對記者行為！之後我就喺通訊group裏面，寫咗句幽默嘅說話「X喺白俄羅斯採訪反而冇事，你哋兩個喺香港採訪旺角遊行反而俾人拉！真係諷刺！」

真係邪到冇人有！我呢句說話留完大概10分鐘，就有相關人員通知我，係白俄羅斯嗰個細嘅，因為喺現場太近採訪示威者，被白俄羅斯警察拘捕左！

咁當時我就相當緊張，諗緊點樣幫佢呢？因為太遠，加上我白俄羅斯冇聯絡人，情況都幾麻煩！尤其是佢哋當地都冇律師！

咁琴晚我諗咗好多方法，或者將成件事煲大佢，首先話比全香港人聽，有一個年輕嘅香港記者係白俄羅斯被警察拘捕左（雖然其實香港人係唔會理）（當時已經聯絡咗啲傳媒機構諗住今日煲大佢）再通知記協睇吓有咩幫到手，但有個風險，就係咁高調就會比白俄羅斯嗰邊知道其實佢係記者，咁就麻煩大咗！

幾個鐘頭後，就收到消息，相關年輕人被捉到警察局，首先俾警察打咗幾拳（全世界警察一撚樣）拆咗張SD卡，由於佢堅持自己只係普通遊客去到現場，佢哋亦都打俾中國領事館溝通完，就放返佢啦！好彩！但係出境可能都有暗湧，真係見步行步！

尋晚我就搞到凌晨三點先瞓！今朝起身見到佢同我報平安！世界政局真係1秒一新鮮！大家繼續經歷大時代！