回想起母親在西安的舊同學 (Patreon)
Content
寫呢篇文章嘅時候我又係有啲感慨!因為世界上面真係要為正義而發聲嘅人其實係好少數!
若果有追開我文章嘅人,都聽過我講關於新疆80年代疫症嘅故事,我再提返少少,80年代中,無論香港傳媒定係外國傳媒都話收到消息,新疆發生極嚴重嘅鼠疫,幾個月內已經死咗幾萬人,甚至後來講佢哋兩年來死咗幾十萬人,喺出入境道路上早就封關,甚至有個表達係要新疆裏面嘅人自生自滅!
我仲好記得當時無論電視畫面,定係新華社發稿嘅文章,都極力否認新疆發生緊或者發生過嚴重鼠疫,甚至佢哋高調譴責外國敵對勢力製造謠言!
後來呢件事就不了了之啦!無他,埸瘟疫又冇傳到其他國家,其他國家就無理啦!
1987年,母親帶我到陝西省旅行,她早已跟其上海時期的舊同事A聯絡好,並安排好一切!我們就由香港直飛西安,入住西安某醫院直屬的賓館!旅遊期間, A安排好相關人員利用政府證件,在各旅遊景點無限制自出自入!
原因好簡單,A當時已經係西安某間政府醫院嘅高層,某個程度上我哋就係利用特權去住宿旅遊!
A差唔多每晚都係陪我哋去食飯,有一晚就提起新疆疫情,A就話確實係冇發生過鼠疫,共產黨極力否認同指責外界,係因為新疆爆發嘅係嚴重嘅傳染性腦膜炎!而並非鼠疫!由於佢喺政府醫院做,佢哋收到內幕消息!
呢幾日諗返,一九年年尾,武漢爆發肺炎初期,幾位冒死公開消息嘅醫護人員警告外界出現不明疫症,可憐嘅係最終佢哋真係染病死亡!
我又諗返起A!當時其實佢都掌握晒所有爆發疫症嘅內幕,但係A都唔會選擇向外間告密,但其實A喺上海嘅期間,都係一位被共產黨迫害嘅家庭長大,佢本身都係反共嘅其實,但係就係因為A喺呢個制度裏邊拼命掙扎捱到成為醫院高層,佢就唔會願意冒失去呢一切嘅風險係講真話!所以講真話嘅人其實真係好值得尊重!
1995我我母親去世,A曾經主動寫信俾我話希望繼續同我聯絡,其實當時我決定唔再同佢有交往,係因為我太明白自己性格,亦都太明白佢擁有係建制之中嘅生活模式,無謂害到人啦!後來真係任何聯絡都冇㗎啦!甚至我懷疑今時今日A應該不在世!