星期日是非日 (Patreon)

近排講起啲恐怖藝人，啱啱聽到電台播佢拍檔首歌，我想分享一件事俾大家聽！話說早年一個初入行嘅歌手，冇人理冇人識，當然冇乜工作添啦，我就喺電台認識佢嘅，當日佢扮到係我粉絲咁嘅狀態，主動過嚟認識我添！

咁我真係好好客嘅，而且我真係一個聽歌嘅人，同歌手做朋友我係好樂意㗎！有一個星期六深夜，突然收到呢個歌手電話，話自己好唔開心好驚，問我可唔可以同佢去酒吧飲下酒傾吓計，好啦！巨蟹座永遠都係朋友嘅心理醫生嚟㗎嘛！聽佢吐苦水之餘佢又話自己對於某啲事情好驚（呢個唔講得）咁我就串佢你信耶穌嘅驚呢啲做乜姐？ ！

有一次佢又打俾我，話自己窮到冇飯食，冇錢開飯，真係開到聲問我可唔可以請佢食飯，我話冇問題啦夜晚過嚟尖沙咀，我唔係請佢食茶餐廳啊，係叫佢喺尖東富臨漁港海鮮酒家真係請佢食海鮮好嘢，但係估都估唔到佢未經我同意之下帶埋啲化妝同助手過嚟一齊食！嘩！呢條友！cheap到！

後來佢出新碟，仲主動話要送隻過嚟俾我叫我比下意見等等！

咁後來呢條友慢慢上位，不過唔係唱歌方面，係演藝方面，有大台照應，開始人人都識佢！

真係睇住佢性格同行為變化，之後真係一個電話一個訊息都冇再比我啦，甚至連最基本新年快樂聖誕快樂嘅訊息都冇㗎！咁後來有一次我去西藏旅行，我喺酒店見到當地電視台播佢哋首歌！我就影低覺得幾得意，寫個WhatsApp訊息俾佢「我竟然喺西藏見到佢哋播你哋啲歌！真係估唔到！」

估都估唔到佢咁樣回我「我而家喺馬來西亞做緊嘢，收到你咁嘅訊息，我都估唔到啦！」即係話我阻住佢？由嗰刻開始我當然唔敢再接觸佢啦，大明星嚟㗎啦！

咁早排呢個人結婚，當然冇通知我啦，當然唔請我去佢婚禮啦！真係好彩，否則我仲要俾你人情！

娛樂圈真係好大染缸，真係睇住一個初出茅廬嘅年輕人變質變性格，當然當然當然都有好多圈內嘅人，都係出污泥而不染，都係做到朋友嘅！

Ps近排先醒起，好多年前就有人托我做中間人接觸佢依家個老婆，搵佢老婆做司儀，佢老婆做DJ嘅！以後呢兩公婆任何嘅嘢，我都唔會再理亦都唔會再幫！娛樂圈大把呢啲好似你欠咗佢咁嘅人！