兩年前北極之旅的奇異事件！ (Patreon)

話說早幾日Facebook提醒返我兩年前我去北極第一日食早餐嘅相片，令我好想同大家分享一個小故事！

話說2017年年尾我突然間中風，雖然係小型中風，對於我來講都係好大打擊，同埋身體虛弱咗好多！其實中風之後我好擔心以後係咪冇機會再旅行，一來身體狀況差咗好多，二來每日要食好多藥。咁八個月之後，我就同自己講，人生苦短，唔理咁多，唔可以阻止我繼續去旅行，於是乎決定去我人生其中一個最想去嘅地方：北極圈，我就唔理三七二十一，冇行程冇安排，買一張香港飛斯德哥爾摩嘅機票，總之不斷向北行，由瑞典入北極圈再入挪威再去北極Svalbard island！成個行程其實係好滿足！而途中發生一件好有趣嘅事，由於中風之後出現一個嚴重嘅副作用，就係完全失去左味覺，就好似依家啲人中武漢肺炎之後咁！但我決定唔理啦，沿途見到咩就食乜，當然整個北歐地區煙三文魚係好出名，同埋每日早餐數以10款煙三文魚任我揀！直到有一日我去到挪威某小鎮，嗰朝早喺酒店食三文魚，覺得乜咁鬼鹹㗎！突然間醒起，啲味覺返咗嚟喎！😱可能係因為放開心情，豁出去乜都玩乜都食，竟然將冇可能發生嘅嘢發生咗，當然如果係傳統西方醫學角度來講呢樣野又係冇可能，但係事實上我味覺突然間返咗嚟，而且陸陸續續回復正常，直到今天！

所以有時遇到疾病，真係心情係可以挑戰一切，所以我唔理㗎啦，不斷會去旅行！而家就係等緊疫症停止，好多地方要去！😂