關於尋日目標射記者嘅情況 (Patreon)
Content
尋日對於我最主要嘅工作,就係mon住手上面大概七個年輕記者嘅位置、會唔會被拘捕、會唔會被無理消失......等等!當中有大傳媒嘅記者,亦有獨立媒體嘅前線記者,真係大家各自爬山,做自己嘅嘢!
咁就想同大家講琴日兩件事,一件比較好笑一件比較慘情!講件好笑先啦,一位前線攝影記者, 20幾歲,真係心口有個勇字嗰隻,佢為求要影到真實嘅畫面,有咁前走咁前!但過去嘅經驗話俾佢知,佢屋企人俾佢貼喺手機嗰度符,可能氣場實在太勁,當佢想靠近水炮車、靠近速龍、靠近防暴胡椒噴霧陣,一個轉身就會消失晒,從來都中唔到任何野,佢唔怕中招,只係怕影唔到靚相!咁琴日喺採訪途中,已經喺電話度發晒火,因為佢三次沖去想影水跑車,就會唔知點解水炮車急速u turn駛離現場唔見咗!😂😂😂😂佢發忟陣!
另一邊廂,我下午就收到一個主流傳媒嘅記者及攝影記者緊急電話,話自己直接比水炮車擊中兩人已經全身濕透疼痛,問我係咪有安排清洗嘅地方,我就話有,喺邊個位置直接上去有人有照應......呢啲前線記者瀨咗嘢係搵我唔係搵佢上司囉!到佢夜晚做晒野之後,我就詳細問清楚,佢話明顯地水炮車係完全針對記者直接開水射!當時攝影師已經全身被射中,他醒目轉頭,但有頭髮耳仔身腳全部濕透!佢話當時其實佢已經不斷流鼻血, F A前來幫佢,咁我就擔心佢會唔會催淚水入咗耳仔再通過去鼻哥引發流鼻血呢?我提議佢去醫院照一照,不過年輕人都係固執堅持唔去,咁我都無謂逼佢啦!下晝有地方俾佢冲身休息吓都算係咁!尋日總括現場大部份記者嘅說法,黑警依然係全盤針對記者去發射水炮車胡椒噴霧等等!肆無忌憚,納粹行為!