尋晚食蘇聯餐廳 (Patreon)

由於尋晚有黃店酒吧新開張諗住去探下班，之前就帶咗兩個手足請佢哋去食飯，喺呢度要介紹吓！

間餐廳叫做「東歐餐廳Ivan The Kozak」，話說我係十幾年前去幫襯呢間餐廳，係我眼中其實係蘇聯餐廳，並唔係東歐餐廳，佢哋用東歐呢個字都係方便香港人嘅啫。當年去食呢間餐廳，係朋友介紹認識老闆Ivan，仲同佢吹咗好耐水，當時我所知道嘅係Ivan老婆係烏克蘭人，所以煮嘅嘢真實係烏克蘭菜！而當時有一味串燒半肥瘦豬肉，係好食到震，我話同我去亞美尼亞食嘅係一樣咁好食，佢先話俾我聽做呢一碟餸嘅就係來自一個亞美尼亞嘅廚師，不過好快就會離開香港唔做！好可惜！ Ivan仲要好熱情咁帶我去參觀當時佢最出名嘅餐廳凍房，仲免費請我哋飲咗兩杯Vodka ！

後來就因為佢哋搬咗地址，我就一直都冇再係佢新鋪食過嘢！直到琴晚我一早訂咗位，去到都見到係全場滿座，另一個去食嘅原因就係原來依家佢係黃店，除咗好多文宣之外，仲掛咗烏克蘭革命時期嘅旗幟，好有心！

重新試咗佢嘅烏克蘭齋羅宋湯，好好飲！叫咗我最喜歡嘅基庫雞（中文餐牌唔係咁寫）好好食！Vodka 火燒豬肉骨！好好食！兩個細嘅叫咗烏克蘭會牛仔肉，佢哋都話好好食，我當然仲要叫埋一尊波羅的海啤酒Royal Baltic Porter 嘆番晚！超級好食！

新餐廳地址係中環雲咸街，琴晚見唔到Ivan，亦見唔到佢老婆，但係見到個流利廣東話嘅鬼仔侍應同鬼妹侍應，我有諗過係咪佢啲親戚同埋仔女？！

都係果句啦，食黃店仲要好食！尋晚真係滿足到暈！兩個手足都食得好開心！

Ps佢啲炸薯片真係用新鮮薯仔切片炸