眾志早已被跟蹤 (Patreon)

關於近排眾志成員包括黃之鋒等等被疑似國安人員跟蹤拍攝，對於我來講真係一啲都唔新鮮！講個小故事俾大家聽：

話說眾志成立第一年不久，我就收到某消息人士直線電話，問我其實熟唔熟羅冠聰，我話都算熟嘅。相關人士就同我講，咁你就唔該叫佢小心啲行事機警啲！我當時完全唔明咩事，佢就好坦白咁同我講，你知唔知今日左派人士，應該仲要係大陸派人落嚟嘅國安，跟咗羅冠聰一日由佢朝頭早出門口到佢去邊度食飯去過邊間便利店買嘢幾時講電話幾時喺邊條街行過全部有記錄！但係佢好似唔為意，唔知道俾人跟蹤咁！當然我覺得成件事都幾匪夷所思，起初都唔係太信，過咗一陣消息人士就話我不如俾你睇吓啲片，就send咗一炸片俾我，全部係羅冠聰被跟蹤嘅影片包括佢入7-Eleven買嘢、入咗邊個住宅大廈去咗邊條街等等！咁我就覺得事態嚴重，亦都馬上用安全電話打咗俾羅冠聰，同佢講晒成個局面叫佢自己小心同埋提醒佢啲黨友小心！咁我要做嘅都做咗㗎啦，班細嘅自己小唔小心我控制唔到㗎啦！所以咁多年後佢哋先高調發現人跟蹤，我反而覺得好奇！

當然，我喺香港好似永遠都成為咗中間傳話人咁！我嘅目標都係要大家安全！