腦電波干擾！ (Patreon)

想分享個小故事，話說尋日中午快快去大快活買個飯盒，因為太多工作要做；好像下午的社會運動若有情況出現就要處理、正在撰寫壹週刊專欄（獨家訪問了母親節當日拍攝黑警對付記者全程畫面的攝影記者）、趕着寫書展的鬼故書.......！忙到嘔茄所以諗住快快食個飯就做嘢！

咁去到大快活睇吓個水牌，打算食咖喱飯，但水牌上邊冇我想食嘅咖喱魚飯，只係有咖喱牛腩同咖喱雞，咁我就喺櫃檯叫咗個咖喱雞飯外賣，而張單都係清清楚楚出咖喱雞飯字樣！咁我去到廚房櫃檯等，就睇住個經理準備用咪叫入廚房之際，我心諗：「有咖喱魚就好啦！」點知個經理真係對住個咪嗌「咖喱魚飯行街」！吓！？？？

到個廚房真係整咗盒咖喱魚飯出嚟，反而前台個夥計發現唔妥話咖喱雞喎！我就衝前話冇問題我食咖喱魚！

首先我係冇特異功能嘅人嚟㗎！但係有時我會覺得腦電波係會影響另一個人，當我腦電波不斷發放訊息想要咖喱魚，對方都會被影響到，好奇怪呀！成件事都幾無聊㗎，想分享吓姐！