睇數碼暴龍電影特別埸 (Patreon)

好坦白講，若果不是我啲細嘅手足話想睇數碼暴龍電影，我都唔會用個人情牌去問電影公司攞戲飛睇優先場！因為數碼暴龍絕對絕對唔係我嘅年齡層睇嘅卡通片，甚至我一集數碼暴龍電視卡通都未睇過，並且當我問個細嘅：「其實數碼暴龍同爆旋陀螺有冇關係㗎？」佢直情返眼對住我！做乜姐！我唔知吖嘛！所以當我琴日下晝帶住三個細嘅（都係20幾歲嘅手足）去到旺角朗豪坊睇數碼暴龍特別埸，我係有啲擔心，我會唔會完全睇唔明之後喺中途瞓着咗？但相反見到三個細嘅喺大堂已經好似撞邪咁！睇到張入場券又大嗌、睇到嗰張海報又大嗌、睇到嗰張特別postcard 又大嗌、甚至入場前，佢哋見到電影公司擺出嚟嗰炸公仔又圍住影相大嗌，全部都變返細路哥（雖然從來佢哋係我眼中都係細路哥）！於是我諗，我應該係呢場電影院裏面最老個位觀眾！🤪完全唔使預測，坐係我身邊三個細路睇到喊晒！但客觀而論，套卡通片又真係實在幾感動嘅，而且又真係終極大結局咁嘅款（啲細嘅話劇透死全家！真係唔可以劇透！若果係數碼暴龍嘅粉絲佢哋話冇理由唔撚衝入戲院睇！）

其實冇諗過數碼暴龍原來有幾似依家香港情況，一向卡通裏面講「被選中嘅細路」正正又係香港呢個大時代一個有一個被選中嘅細路要為呢個社會去打怪獸打敵人！無奈嘅係，人總要成長總要長大，當啲細路成長又要面對好多好現實嘅問題！同我哋香港而家啲細路係好相似！真係唔怪得會睇到佢哋喊晒！呢個時代正正就係佢哋面對緊嘅掙扎時期！加上佢哋喺手足，就更加明白！對於我呢個老嘢，我都覺得套戲幾感動！其實係我哋嘅細個都係有呢種同樣嘅掙扎同經歷！不過最後我都想問多句：「數碼暴龍其實同寵物小精靈有冇關係㗎？！」😂😂😂