九龍城裁判處見聞錄 (Patreon)
Content
之前也講過,有個我認識嘅手足11月被黑警濫捕落案起訴後,仲要唔俾佢保釋,咁差唔多每次上庭我都有去旁聽支持佢,但之前兩次我就冇出席,因為一次我喺日本上一次身體唔舒服到唔到!
咁尋日我朋友1:00已經去到排隊因為佢話俾我聽法庭會玩嘢,OK我1:15去到,等2:30開庭,以往九龍城裁判處嘅做法係所有人會可以上5樓1號庭外邊大堂等候再排隊攞籌,好合理好簡單,咁琴日真係玩嘢囉!首先尋日單案檢控官係將五個手足嘅案件申請合併處理,所以特別多兄弟姊妹同埋家人會到場聆聽,咁法庭明知道會多人,佢竟然要所有人喺上電梯之前已經要排隊排到出地面行人路!頂你個肺!琴日30幾度,我就首先捉咗個保安員問,佢話因為上邊職員食lunch冇人所以未開得!吓!以前一點幾所有人都可以喺上邊㗎啦喎!咁我就已經直接打電話俾九龍城裁判處書記處想做投訴,跳咗去個聲音廣播,冇人會接之後就會cut你線!頂!過咗幾個字我就再叫咗個着西裝嘅法庭職員過嚟問清楚到底咩意思呢?呢個職員就唔用食lunch做藉口啦,呢條粉腸就話因為疫症,要守疫症規矩,所以上邊空間唔夠咪要大家排下面囉!我話呢度都好似係發展範圍可(我指住個禁止攝影個牌)咁點解呢度又唔洗守疫症規矩夾1.5米呢?個廢柴職員好笑到話:「咁若果你執正防疫條例咁排,排到對面行人路㗎啦喎!」我回佢:「而家好似係你地執正嚟做,先至唔俾我哋喺5樓有冷氣大堂等喎叫我哋落晒地下喎!」佢呆左呆,我於是乎問佢攞正式嘅投訴電話號碼佢死都唔俾我!
好啦2:00到終於可以坐電梯攞籌,上到去見到手足嘅媽媽,佢同我講件事我就真係一定會去法院投訴,竟然法院會利用疫症,只係準當事人一個家人攞籌出席法庭!呢個係完全違反過去100年香港法庭嘅規矩同法例!之後我就在場再問法院職員599條例係唔可以凌駕法院規例唔俾當事人家人攞籌入去㗎喎!職員都好坦白講其實係唔得㗎,因為政府用防疫條例落咗指令咁就要兩難取捨啦!明顯就係想留難所有手足家人同埋朋友旁聽,我完全不能接受呢件事我嚟緊呢個禮拜我一定會去法院投訴,絕對違反國際人權公約!就算最終投訴唔受理我都要port到你盡!行政指令凌駕法院條例???!!!
Btw尋日最終用咗幾個鐘頭檢控官令到五單個案合併轉介灣仔區法院再審,係我眼中當然唔公平啦!有人係路過現場被控非法集結,有人被警方話係搜查到背囊有攻擊性武器,但係全部人要面對同一指控,政府真係玩嘢!