落實黃色經濟圈 (Patreon)

坦白講喺香港要真係實踐每一樣野都幫襯黃色經濟圈其實係好難嘅，尤其是黃色食店，........Errrrrr真係好多都幾難食！但我呢排喺疫症期間，點都要支持呢個經濟圈，所以當朋友個獨立屋要搵室內設計師問我介紹，佢同我都堅持要搵黃色背景設計師，咁我經我老友Zeno介紹，一個深黃室內設計師老闆養住10個夥計，今個星期就接咗個朋友張單啦！

咁琴日我去深水埗買嘢，見到有檔賣寵物用品嘅，有我想買好耐嘅連狗公仔，即刻買咗個！老闆係黃，佢都係幫黃手足代賣公仔！正！

咁由於我屋企係唔能夠冇花！（呢個係我10幾年習慣）咁我近排就搵到間黃花店，今日就訂咗一大束我最鍾意嘅紅玫瑰，老闆娘仲送咗啲禮物比我添！

呢個經濟圈喺香港其實都仲係小眾，但真係要慢慢慢慢建立，起碼係呢個時期唔可以比佢哋執笠！冇理由俾啲藍色仆街睇死！大家都可以一步一步慢慢嚟！