當年中共對我的統戰工作 (Patreon)

若果你有睇我2019年嘅個人show家春秋，你就會明白我屋企嘅複雜性！咁喺呢度分享一件事俾大家睇，話說1997年香港啱啱交返畀中國政府，咁我北京其中一位親戚就寄咗呢封信比我！！

咩嚟嘅呢？！係一封出版嘅轉介信，呢個親戚當然就係中共國務院裏面工作㗎啦，佢就主動幫我聯絡左所謂嘅同學，話會幫我喺深圳呢間出版社出版任何我想出嘅書籍，呢個吸引度係非常非常之大！

你諗下1997年我淨係幫緊雜誌報紙寫文章，一本書都未出過，之後就中共核心機關，重要以紀律檢查委員會名義信紙寫呢封信俾我，另外再寫多封信比嗰個深圳出版社嘅負責人，根本就係尚方寶劍嚟㗎啦！我攞住個封信去搵當事人，佢夠膽唔幫我出？！

當然換着好多香港作家，一定叩晒頭衝上去賺14億人錢啦！但我思前想後左好一段時間，首先中共幫你做到咁大嘅幫忙，日後一定要還㗎！我真係唔會咁天真！第二你一企埋去中共政權嗰邊，你嘅自由度包括你嘅思想自由都一定受到某程度上嘅規範㗎啦！我實在係一個完全唔會被建制規範嘅人！

咁我就拒絕左呢個咁好嘅Offer，中共喺呢次向我統戰工作上邊叫做失敗咗！諗返轉頭，我真係一啲都冇後悔到，否則依家個春袋就俾人揸住㗎啦！可能你認為我傻啦！當年有錢唔搵有權勢唔攞！咁我一向都係反叛嘅！