迪士尼的暗黑公關手段! (Patreon)
Content
伸利先:同香港迪士尼冇乜兩句,亦都從來冇去過香港迪士尼玩!近排同一啲香港傳媒傾開計,就傾開迪士尼嘅公關宣傳手段原來都幾奇怪個喎!
話說香港迪士尼有自己嘅公關宣傳部門,但某程度上呢班人係完全冇話事權冇執行權,全部都要等美國總公司去發放公關內容宣傳內容等等,但係原來私底下香港呢班同事又會同香港傳媒暗地裏進行交流溝通等等,講白啲仔發放小道消息比認識嘅傳媒朋友,但當傳媒真係刊登呢啲小道消息嘅時候,香港迪士尼呢班宣傳公關人士就會否認曾經存在過呢啲溝通同埋否認傳媒嘅報道!🙄
咁近排香港迪士尼又發生件奇怪事,話說早排佢哋預先通知各傳媒將會有一個電話聯繫嘅發佈會(應該係因為疫症)但係佢哋就講到明接電話嘅人士必須要係傳媒嘅採訪主任級別,普通記者係唔可以參與唔可以聽呢個電話報道甚至唔可以喺隔離偷聽,咁點解呢?原來當日香港迪士尼公關部就同呢一批傳媒嘅採訪主任講:「迪士尼上年嘅營業收入下跌係因為受到呢場社會運動影響.......!」(不如繼續賴佔中啦!)但係發佈會之後發放比普通記者嘅文字稿裏邊就冇咗呢一句!點解呢?原來就係唔想比普通記者認為迪士尼幫政府講嘢(但事實係),到記者寫完篇稿件交返畀採訪主任對嘅時候,採訪主任就可以加返呢句:係因為香港社會運動影響迪士尼嘅收入!咁絕大部份傳媒前線記者就唔會知道其實呢個係迪士尼嘅新聞稿,會認為只不過係採訪主任自己嘅主觀諗法!
迪士尼啲公關手段賤格唔在講,我諗到嘅係咁迪士尼同呢班傳媒嘅採訪主任級別嘅高層有冇利益關係先?有冇貪污先?有冇利益輸送先?希望廉政公署睇睇啦!