兩個郵箱號碼地址 (Patreon)

上年個人talk show「家春秋」八場之中就只有一埸講過呢件事，咁我而家就寫寫出嚟比其他人知道。

話說我出世之前，我家族就有個郵箱地址作為各界聯絡方式，所以我小學開始就已經叫所有人寄信俾我寄去嗰個郵箱號碼啦！咁去到80年代某一日，就發生一件離奇事！英國管治下嘅香港政府突然間接觸我屋企，主動提出請求可唔可以將我哋用咗幾十年嘅郵箱號碼交還俾香港政府，佢哋聲稱因為呢個號碼政府想要，交還之後香港政府會分配另一個郵箱號碼俾我哋！我老竇堅持唔肯，死都一定要呢個Number，咁最終香港政府都放棄左要求，而呢個家族用嘅郵箱號碼就用到今時今日！當然成件事都係咁謎團啦，香港政府咁多郵箱Number點解係要我哋屋企嗰個呢？當然有人認為係關政治事，我就唔夠膽揣測太多啦！

不過你話完全唔關政治事我又唔信嘅，話說去到1995年，我就決定自己再申請多一個郵箱號碼，獨立於我家族，而離奇嘅係，最初我擁有左呢個郵箱號碼之後，頭一兩年我經常發現人哋寄來嘅信件都係比人哋拆開左！而每次俾人拆開左個信件，政府都會套一個透明膠袋上面貼一個label表示收到信件嘅時候已經爛咗㗎啦！無私顯見私！此地無銀三百兩！我心諗你哋咪拆開來睇囉！你估我做間諜嘅咩！而用咗兩年之後，即係1997年之後我啲信件就從來都冇俾人打開過！亦都可以咁講即係港英政府對我同對我家族係抱有極大懷疑！

咁九七年後個政府係咪對我哋冇懷疑呢？我又唔夠膽咁講！不過無論係我家族嘅郵箱號碼同埋我個私人郵箱號碼，而家都係由我管㗎啦！而且我個私人郵箱號碼地址係公開嘅，所有讀者都可以寫信比我嘅！不過依家好少讀者寫信㗎啦！