日本城市傳聞：「月台加裝藍光為降低跳軌自殺率」之謎 (Patreon)

「城市傳聞」：今朝聽BBC中文廣播，難得地報道及討論一個近似城市傳聞的東西，就係日本火車站加設藍光系統嘅目的：防止自殺！

大家都知道日本嘅自殺率一向係全球最高之一，近年有所降低但係年輕人自殺率都係一直偏高！BBC報道日本好多火車站月台加設藍光，希望影響有自殺傾向嘅乘客，令到佢哋情緒穩定，報道表達係當局認同呢個想法所以做呢樣野！首先我好坦白講，我真係去過日本咁多次或者我唔留心，我真係一次都冇見過月台有呢啲藍光，第二，報道指當局認為呢種效果有成效就更加令我詫異！

因為一直以來傳說當局設立藍光防自殺，後期喺網絡上邊都話呢個只係城市傳聞，係假新聞；但若果根據BBC嘅報道，呢個係真個喎！而且佢引述早稻田大學做出嘅研究都話藍光減少自殺率係有證據，不過相關教授強調，佢認為加藍光防自殺比較不切實際，不如喺月台加晒所有閘門，我又覺得佢講得好岩喎！擺藍光可能只係幫政府慳錢咋！而且喺日頭自殺嗰啲咁點呢？

而報道亦都引述英國同樣做相對嘅調查實驗，又認為藍光阻止自殺其實冇實質證據，甚至有日本城市夜晚街邊放藍光去阻止罪案發生都係冇實質證據，英國調查講到若果藍光真係有作用，時間長咗乘客習慣咗，就冇乜影響啦！咁即係點呢？即係個報道證實咗呢個係城市傳聞？定證實咗呢個唔係城市傳聞呢？！阿媽，我好亂啊！

等我下次去日本留意吓夜晚嘅鐵路月台先，不過啱啱去完河津嘅夜晚月台係冇呢樣野！