關於武漢 (Patreon)

關於武漢其實我係想寫個小故事俾你哋聽。若果你真係我嘅忠粉，你就會明白我本身嘅身份背景係有啲複雜，有時我會利用呢個身份背景，又有事我會比呢個身份背景阻礙到，就睇唔同嘅情形點樣去發生，無奈地我通常都隨遇而安，冇計，我控制唔到嘅嘢太多！所以過去幾十年，我一直都諗緊呢個問題，到底我呢個身份背景係外國嘅邊防人員名單裏面有冇記錄呢？當然上一次去以色列嘅經驗就話俾我知佢哋有！美國就唔使諗㗎啦！德國就可能有可能冇！咁大陸嘅邊防到底有冇呢？我呢個諗法都太天真啦掛！當然係有，不過我唔知道佢嘅程度去到邊！直至大約10年前，聽過我節目嘅都知道…我同兩個老友當年就參加左新華旅行社嘅長江三峽遊船之旅，當時我係跟着旅行團由香港直飛武漢，當我兩個朋友過咗關喺前面等我個刻，我遞上我嘅回鄉卡，前面個關員小姐望一望我，之後見到後邊兩個朋友澄大左隻眼，我就見到個電腦畫面不斷閃出紅色光嘅反射（後來朋友同我講我一個嗰張回鄉卡個電腦就喺度閃紅燈）W T F！我從來都冇懷疑過我係返唔到大陸（就算佔中之後）咁我當時就覺得好奇怪？咩事呢？之後個女關員好客氣咁同我講:「陳先生！唔好意思，有啲情況出現咗我要請示我上司，請你過去那邊坐一坐等一等！」當刻我就想起，其實當日就係瑞典諾貝爾和平獎頒獎比劉曉波（當年劉曉波仲係東北未被逮捕未死）可能就係嗰日日子引起敏感，但係我心諗：一，我係武漢唔通再飛過去東北訪問劉曉波咩！二，原來中共對我都有咁大嘅唔信任！過咗15分鐘嗰位女關員走番出嚟同我講：「我哋請示左上級，冇問題你今次可以入境，祝你旅途愉快！」嗰刻開始我就知道全中國嘅邊防記錄名單之中都應該有我名！爭在佢會唔會比我入境，當然我由出世到上年年初，我都從來未比中共拒絕過入境！上年六月到而家我就未返過大陸啦！因為我唔想冒呢個風險！話晒係中共眼中我都係一個好唔聽話嘅人！