2019年雲海小事回顧 (Patreon)
Content
1月1日,又簡單回顧一下2019年!
1.當然六月開始就是一埸抗爭運動,一場無止境抗爭運動,由6月9號開始,我由支助一班救護用品、到某些前線記者裝備、到某些人生活費......我同朋友講笑:「最初係倒水咁倒,到而家係海嘯!」但有時我都同我班仔講:「我依然係你地最大嘅後盾!有乜嘢事就出聲!」好彩我個底都有少少厚度!講真,我最初以為呢個運動兩個月就完㗎啦!點會諗到拖到而家都未見到完嘅盡頭!收穫嘅就係我做咗好多人個老竇,同埋真心覺得原來做老竇照顧仔都幾費心神㗎!我打電話叫人瞓覺同食飯都唔知打咗幾多個月!有時都覺得自己做乜事啫你!😵
2.有幾場「咪咪後野」,我有講到,今次區議會選舉,咁我進行左一次秘密隱形行動,同時進行三個安排,兩個徹底失敗咗,而且令我跌晒眼鏡,只有一個成功,但令我見證到乜嘢叫做人性嘅可怕!亦都係果句啦,我本身就唔會參政㗎啦!我同有啲人講過點解,因為我好了解自己,金錢係收買唔到我,但我相信權力係可以,所以我點都唔會進入呢個有權力範圍嘅空間令自己腐化!
3.今年旅行少咗,係因為其中三個長旅行我取消咗,將啲錢放晒落去呢場社會運動,但係三月份去西非三國簡直令我大開眼界,真係真心覺得乜嘢叫做睇書同喺現場見嘅好大落差,簡直去咗另一個宇宙咁樣,真係當地冇人諗嘢正常㗎,悲哀嘅係佢哋都係地球人!唉!當然九月份去東帝汶就純粹插旗啫!我話過要一世去晒所有國家,點都唔可以死住!
4.我人生最重要嘅係朋友,今年都識多咗好多新朋友,而且都係我好鍾意嘅朋友,19年呢方面真係一啲都唔差!絕交都有幾個,禮物都唔送添!下世都唔想見!😓而且特登搵返好多好多年冇見嘅朋友食飯傾計,對我來講Relationship 係最重要!
5.今年事業有起有跌啦!年中被星島夾硬cut咗專欄,而出版書籍當然已經唔可能會賣得幾多,當然最開心係壹周刊主動搵我長期寫專欄,真係冇自我審查過下好嘛!(當然同黎智英鬧交係另一個驚喜!諗返轉頭一個癲佬同另一個癲佬點溝通?!)仲有「咪咪後嘢」2家春秋叫做順利完成!
6.當然上年仲有個小小秘密,就係竟然我會墮入情網!鍾意咗個唔應該鍾意嘅人,或者咁講,鍾意咗個唔可能會一齊到嘅人!過去20年都冇諗過拍拖,上年突然間動情(人老咗?)仲要好笑到走去同個所謂情敵攤牌!不過我啲老友都話嗰個人其實想利用我多啲,你估我唔明咩,有時愛情真係盲目㗎!詳細當然唔講啦!諗返轉頭當單戀算啦!今年都冇乜期望,繼續做返單身主義者算啦!😩
7.宗教方面,上年正式同自己攤牌,根本就係佛教徒唔好咁虛偽!詳情之前喺呢度寫咗啦自己睇返!
(完!)