電影「潛航核戰」影評 (Patreon)

講真，已經唔記得上次睇一套法國主流電影是什麼時候！而且不是被邀請參加首映或優先場，而是主動買飛入場睇法國片，更少有！但好驚喜！劇本其實唔係好複雜但係非常紮實，呢啲就叫做好劇本！而且意想不到地緊湊，同埋諗都諗唔到一套水底潛水艇戰爭片，去到最後真係差啲令我流下馬尿來！因為佢其實講咗一個好簡單嘅人生大道理：犧牲去換取自己相信嘅嘢！而且都係無法挽回嘅犧牲！這就是人生！而且電影帶出咗一個可以話係永恆嘅現代哲學問題：當自己製作左一套冇辦法突破嘅規矩規限，但又特定遇到一個相當不尋常嘅事件，非要自我突破返呢個自己特定嘅規矩不可！呢種人性嘅掙扎同矛盾點樣自處呢！其實呢個都係每一個人每一日要面對嘅問題，每一日要自我挑戰原本自己信任嘅諗法！自我挑戰自我突破其實人生未停過！只係爭在你覺得值唔值去推翻之前嘅自己！當然係會充滿掙扎同埋不安！但大家每日都面對緊！ 尤其是我，呢半年過去，我已經完全唔再相信香港社會呢個制度同埋架構，等如我唔會再相信投訴機制一樣，但我人生本身原本係好跟隨同埋依照投訴機制去處事嘅人，而家我每日都要推翻自己嘅諗法，之後去面對點樣處理一啲不公義嘅問題！心理矛盾其實從來未停止過，都幾撚辛苦㗎！話說回來，呢套電影真係值得入場觀看，唔係太懂得政治同軍事嘅人都完全會睇得明！