那些年我的遊玩天台 (Patreon)

關於早幾日尖沙咀某大廈天台懷疑保安員離奇喪命事件，我點都要講下，事關呢個天台我真係留低左我整個童年腳毛！話說果等大廈我以前有個老友住喺嗰度，每逢星期日嘅下晝我就會去佢屋企玩，而其中一個瞞住所有大人玩嘅遊戲就係上天台玩捉迷藏！喺天台琴來琴去！後來80年代有一套我最鍾意嘅電影叫做神奇兩女俠，就係喺呢個天台搭左間屋出嚟拍嘅！所以對我哋講又非常之熟悉！嗰日見到啲警察包圍整棟大廈守正睇閉路電視！真係笑出黎！大佬果棟大廈嘅天台係可以爬去隔離大廈天台㗎！我哋就係咁樣玩捉迷藏㗎！而警方就只係查果幢大廈嘅閉路電視，點捉兇手啊！當年住得喺呢幢大廈嘅真係非富則貴㗎，你諗下我朋友個單位係3200尺！所以對於我來講住緊1000尺係窮人嚟㗎啦！能夠想像係佢屋企裏邊有一個佛堂、騎樓位置大過我間房！當然命案發生之後我同啲街坊打聽之下先知道，原來嗰啲單位已經由一個單位間成16個劏房，我朋友成家一早就賣咗移民澳洲啦！如果佢哋堅持唔走而家億萬富翁嚟㗎啦！