英國新聞 英國科技大亨組織公司遊艇旅行遭遇水龍捲 遊艇沉沒後連同其他五人一齊失蹤 20-8-2024 (Patreon)

一艘名為 Bayesian 嘅遊艇喺當地時間大約清晨五點左右遇到一場引發海上出現水龍捲嘅猛烈風暴後翻覆，船上面有六個人失踪，其中包括英國科技大亨米克 · 林奇（ Mike Lynch ）。有倖存者表示，呢次係一次由林奇先生為佢嘅工作同事組織嘅遊艇旅行。

水龍捲類似於龍捲風，可以喺海洋、海或者大型湖泊上面形成。目擊者話比意大利安莎通訊社知，當暴風來襲時， Bayesian 號嘅錨已經下放，導致桅杆斷裂，船隻失去平衡並喺西西里島首都巴勒莫附近嘅 Porticello 村海岸沉沒。

英國科技大亨米克 · 林奇（ Mike Lynch ）同佢18歲嘅女係星期一清晨豪華遊艇喺西西里島海岸沉沒後失蹤嘅六人之一。林奇先生被一啲人稱為「英國嘅比爾 · 蓋茨」，佢共同創立咗軟件公司 Autonomy ，該公司後來被科技巨頭惠普以86億英鎊收購。呢艘56米長嘅遊艇上共載有22人，包括英國、美國同加拿大嘅人。BBC 查閱咗企業記錄，發現 Bayesian 號嘅所有權同林奇先生嘅妻子安祖娜 · 巴卡雷斯（ Angela Bacares ）有關。同呢件事相關嘅消息來源已經向 BBC 證實，巴卡雷斯女士已經獲救。另外，暫時有十五人獲救，當中包括一名一歲嘅英國女童，當局正繼續進行夜間搜索。潛水員已經喺水面下50米處發現咗殘骸，並且正喺度搵失蹤者。

西西里島民防機構總幹事薩爾瓦多 · 高奇納（ Salvatore Cocina ），林奇先生、佢嘅女漢娜 · 林奇（ Hannah Lynch ）以及遊艇嘅廚師都係失蹤者之一。佢又表示，參與救援嘅洞穴探險同潛水隊將會持續進行夜間搜救。而一名男子嘅遺體已經喺殘骸外被發現，但佢嘅國籍尚未確認。

安莎通訊社報導，一名35歲嘅母親喺海中緊抱住佢一歲嘅女兒。呢名女子喺當地被確認為夏洛特 · 戈倫斯基（ Charlotte Golunski ），佢話：「我有兩秒鐘失去咗我個女，但隨後喺狂風巨浪中馬上再次抱住咗佢。我緊緊抱住佢，令佢靠近我，而海面非常洶湧。好多人喺度尖叫。好彩嘅係，救生艇膨脹咗，我哋十一個人成功上船。」據報導，呢名嬰兒狀況良好，而呢位母親則接受咗縫合治療。佢補充話，佢同佢老公 以及來自倫敦公司嘅一啲同事都安全無恙。

一啲倖存者被送往巴勒莫嘅 Di Cristina 醫院，一名駐院醫生表示，佢哋「非常疲倦」並且「不斷詢問失蹤者嘅情況」。醫生話：「我哋已經向倖存者提供咗呢啲資訊，但佢哋一直喺度講嘢同喊，因為佢哋意識到搵到朋友生還嘅希望渺茫。」

倖存者表示，呢次旅行係林奇先生為佢嘅工作同事組織嘅。喺事故發生後唔久，一艘附近懸掛荷蘭國旗嘅船隻喺波浪中救起咗倖存者，並照顧佢哋直到緊急服務人員抵達。船長卡斯坦 · 博納（ Karsten Borner ）話，暴風過後，船員留意到原本喺佢哋身後嘅遊艇已經消失。佢同路透社講：「我哋見到咗一個紅色嘅照明彈，所以我同我嘅大副去到嗰個位置，發現咗一個漂流嘅救生筏。」佢話，嗰個救生筏上載住十五名倖存者，其中三人「傷勢嚴重」。

從殘骸現場拍攝嘅畫面顯示，直升機喺數艘海岸警衛隊船隻上空盤旋，而穿着鮮橙色潛水衣嘅潛水員正落水。意大利海岸警衛隊表示，被救出嘅八人正喺醫院接受治療。自上星期中期以來，地中海西部持續經歷強烈風暴。星期日晚至星期一清晨，惡劣天氣經過西西里島北部海岸。

英國外交部表示，正為一啲喺西西里島事件中受影響嘅英國國民及其家屬提供支持。英國海事事故調查處亦派出咗一個檢查小組，對呢艘英國註冊船隻嘅沉沒進行「初步評估」。

Bayesian 號嘅註冊所有者被列為 Revtom Ltd 。呢艘超級遊艇最多可以容納12名客人，分布喺六個套房內。據了解，遊艇嘅名字基於貝葉斯理論，呢個亦係林奇先生嘅博士論文及佢發家致富嘅軟件嘅基礎。林奇先生嘅妻子巴卡雷斯女士被列為註冊喺曼島嘅 Revtom 公司嘅唯一合法所有者。管理呢艘二零零八年建造嘅遊艇嘅公司 Camper and Nicholsons International 嘅發言人同 BBC Verify 講：「我哋嘅首要任務係協助進行持續嘅搜救工作，並為被救嘅乘客同船員提供一切必要嘅支持。」