英國新聞 哈里王子ITV受訪表示︰對梅根嚟講返英國仍然係好危險 26-7-2024 (Patreon)

修適士公爵哈里王子喺對《鏡報集團報業公司》嘅法律訴訟結束之後喺ITV首次接受重大訪問，佢表示，佢同媒體嘅鬥爭係破壞佢同家人關係嘅核心原因。佢又表示對佢嘅妻子修適士公爵夫人梅根嚟講，返英國仍然好危險。佢話，由於佢哋夫婦所吸引到嘅關注，佢擔心梅根如果返英國會遭到攻擊。喺 ITV 紀錄片《小報受審》(Tabloids On Trial) 中被問及法律鬥爭會唔會吸引更多關注嘅時候，哈里王子回答話佢哋兩夫婦已經有足夠多嘅關注。佢補充話啲英國傳媒逼得佢哋兩夫婦太緊。

「英國仍然係好危險，只需要有一個讀過呢啲不實報導嘅人走出嚟對我哋有所行動，無論佢係用刀定係硫酸嚟搞搞震都好，呢啲都係我真正需要小心提防。呢個就係我唔會畀我妻子返回呢個國家嘅原因之一。」

當被問及佢嘅家人點解唔似佢咁選擇向傳媒還擊時，哈里王子話：「我認為所有發生嘅事都令人睇到咗事情嘅真相。對我嚟講，呢項任務仲係繼續緊，但確實，如你所講，呢個造成咗部分我哋家人之間嘅裂痕。」再被問到喺高等法院文件中聲稱英女皇伊麗莎白二世「支持」佢對新聞報業集團 NGN ，包括《太陽報》同現已停刊嘅《世界新聞報》嘅行動時，哈里王子就話佢真係希望喺英女皇逝世之前進行更多對話，英女皇非常支持佢。哈里王子話︰「英女皇知道呢個對我嚟講意味住啲咩，而且⋯佢一直喺度，毫無疑問噉會堅持到底。」

喺證人陳述中，哈里王子聲稱已故英女皇希望媒體大亨魯珀特·梅鐸「道歉」。哈里王子正係對新聞報業集團提出咗訴訟，指控佢哋非法獲取資訊，不過就唔包括電話竊聽，正式審判預計會喺一月進行。新聞報業集團之前否認《太陽報》存在非法活動。

哈里王子喺另一件案中起訴《鏡報集團報業公司》（ MGN ），指控佢旗下出版物嘅記者同用電話竊聽、透過欺騙獲取資訊，以及使用私家偵探進行非法活動等手段有關。法庭發現當中有15篇文章係用非法資料收集嘅結果寫成嘅，最後哈里王子同鏡報集團喺2月以「額外嘅高額賠償金」加上哈里嘅法律費用達成和解，解決咗佢嘅其餘索償。喺再之前上年12月嘅一項裁決中，法庭指喺九十年代後期，鏡報集團報業公司旗下刊物經常用電話竊聽，而且哈里王子嘅電話就被呢個集團竊聽咗好多次，並因此獲得咗十四萬六千英鎊嘅賠償。

旗下刊物喺節目中回應道：「我哋歡迎2023年12月嘅判決，呢個判詞為我哋公司提供咗必要嘅、清晰嘅指引，令我哋可以從多年前發生嘅事件中前進。對於歷史上嘅不當行為，我哋毫無保留咁道歉，承擔咗全部責任並支付咗賠償。」