英國新聞 肯特郡軍營發生傷人事件 一名英國陸軍士兵被嚴重刺傷 24-7-2024 (Patreon)

肯特郡軍營附近發生士兵被刺傷事件，一名士兵情況嚴重。一名英國陸軍士兵喺肯特郡被刺傷後，被送去醫院治理，目前喺當地醫院留醫，佢嘅情況嚴重。呢名士兵係喺星期二嘅時候喺屋企附近着住制服時遭到襲擊。內政部表示，呢件刺傷事件並唔係恐怖主義事件，相信係由於精神健康問題引發嘅事故。呢名四十幾歲嘅士兵係喺英國時間接近晚上六點喺驕寧咸嘅 Sally Port Gardens 被襲擊。一名24歲男子喺大約25分鐘後因為涉嫌謀殺未遂而被逮捕。呢名士兵被送往醫院，肯特警方表示佢情況嚴重。

呢件傷人事件發生喺布朗普頓軍營附近，呢個軍營係英國陸軍第1皇家軍事工程學校團嘅總部所在地。一名住喺事發地點附近嘅女性表示，佢當時正同屋企人一齊食晚餐，聽到一聲「巨大尖叫」。佢話，當佢哋跑到窗邊時，見到襲擊者對地上嘅受害者進行最後一刀刺傷，隨後駕駛一架電單車逃離現場。佢話︰「呢個真係非常非常可怕。」

首相施紀賢喺社交平台 X 平台上寫話：「我對呢個消息感到震驚同震撼，我哋所有嘅祝福都同呢名士兵、佢嘅家人以及我哋嘅武裝部隊同在，佢哋嘅服務保障咗我哋嘅安全。我希望佢可以迅速康復。」內政大臣顧綺慧亦喺 X 平台上表示，呢件刺傷事件「令人震驚同震撼」。

陸軍總參謀長羅利 · 沃克爵士表示，佢對呢件可怕而無喇喇發生嘅襲擊感到悲痛。佢確認受害者係一名陸軍軍官。陸軍官方發言人表示︰「我哋非常遺憾地確認一名士兵喺襲擊中受咗重傷。我哋嘅思念同呢名士兵及其家人同在，我哋請求喺呢個艱難時期尊重佢哋嘅隱私，我哋會繼續同肯特警方密切合作，了解事件經過並支持調查。任何目擊襲擊事件或有相關資訊嘅人，都應該聯絡肯特警方。」

肯特警方嘅一位發言人補充話：「目前事發地點已經被封鎖，調查仍然進行中以確定事件嘅具體情況，預計呢個地區會持續有警方駐守。」

BBC 記者現場採訪時表事發地點今朝呢度仍然係靜英英，警方封鎖咗發生襲擊嘅道路兩端。一位今朝步行前往車站嘅男子話︰「呢件事發生喺我放工返屋企嘅路上，真係令人唔開心。」而另一位帶狗散步嘅女子話，佢見到咗直升機同空中救護車。佢表示希望被襲擊嘅男子可以早日康復。