【讀者分享♟】 回應《挑戰九七》：為甚麼不考慮 Kickstarter？ (Patreon)

呢類咁小眾的桌遊，通常係要放上Kickstarter、gamefound呢類眾籌平台，先有機會成功。一嚟接觸到嘅受眾大好多，而且面向國際，二嚟如果眾籌唔成功，就可以隨時放棄，開頭要投放的成本較少，風險就較低。

眾籌成功後當然要交貨，雖則Kickstarter講明冇話保證一定有貨交，但有部分project最後真係交唔到貨，最後當然俾人咒怨。唔好話以九七回歸呢啲咁刁鑽嘅題材，單純以香港史為題材的board game其實唔多。

幾年前，就出過一副board game叫《Glory Recalled: Hong Kong 1941》，兩個玩家，一個做日軍，另一個做英屬香港，前者當然要入侵後者取勝，後者則要盡量拖延，若干個回合後日軍都未佔領全香港的話，國軍援軍就會出現，咁就算英屬香港贏：

Glory Recalled : Hong Kong 1941, via @Kickstarter https://www.kickstarter.com/projects/181148798/glory-recalled-hong-kong-1941?ref=android_project_share

教授可以考慮製作更多香港主題嘅桌遊，市場需求就一定有嘅，都算係保育香港文化嘅一條出路，而且買桌遊唔一定係為咗玩，亦可以係為收藏。

不過出限量版就一定係指定動作，第日又有人想買嘅話就喺Kickstarter出second print，夠一定數量先大量生產。唔好忘記出多國語言版，如果得中文版的話，外國人唔會買。唔好忘記出retailer版，容許其他桌遊零售商低價買入multiple copies，可以加快散貨速度。

我曾經向《Glory Recalled: Hong Kong 1941》的創作者David Cheng建議，推出以六七暴動為主題的board game，運作同前作差不多，一個玩家做港英政府，另一個做土共，港英自然要鐵腕平亂，另外要運走晒匯豐銀行啲黃金，再捱到北京叫停土共，土共就要與時間鬥快盡快推翻港英政府解放香港，令「新香港」提早五十年誕生。最後當然不了了之。

不過就算真係成事，香港土共都應該會唔開心。連鄭立個《民國無雙》都被大陸禁止，呢類敏感題材嘅桌遊，又會帶來什麼風波和麻煩？

如果想整board game，實體以外還有其他出路，就係整PC版放上Steam度賣。 《Glory Recalled: Hong Kong 1941》 已經有PC版，Steam有得買，冇買嘅朋友可以試試。暫時未知Steam的抗壓能力如何，當初《還願》係被開發者下架，唔係被Steam下架。

講開《願榮光歸香港》同小熊維尼，我覺得最近小粉紅大戰英國鋼琴家都係個值得參考的例子，若果對方唔係鬼佬而係中國人，效果很可能不一樣，因為鬼佬明顯會更被英語世界受眾關注。這代表什麼？任何project，只要團隊裡有個唔買中國帳、又有一定關注度嘅鬼佬參與，當局就會投鼠忌器。

所以即使開頭戰狼上身，其後英國鋼琴家再帶小熊維尼上陣，小粉紅收尾都要龜縮。

▶️ 香港人的轉捩點：經典本土桌遊《挑戰九七》官方復刻版預購最後召集https://www.youtube.com/watch?v=y1AYOuipM90