【讀者分享】復仇女神：果位阿姐究竟想點？ (Patreon)

各位，我真心想問， 虛心求教，撇除黃色藍色、恩怨情仇、暫時既往暫時不咎先，否則討論唔到落去。 

其實，「果位阿姐究竟想點？」  

好，佢話要谷針，谷到唔打入唔到任何in door buildings，為既係做靚條數； 

好，佢話要清零，佢都跟稿講到解釋唔到個terms，仲要繼續做，全宇宙都知佢自己唔知自己做緊咩；  

好，佢話要停工停課，咁搞一搞好傷，個肺炎都玩左兩年，大家都經驗過咁停係冇意思，只會搞死好多各行各業；   

你知、我知、單眼佬都知，個數字只會keep住上，除左curfew根本做咩都唔會減慢到，週圍國家都有版大家睇。人哋放棄係有原因，因為對比之下死亡率好低，同埋咁搞法啲市民同社會會頂唔住。

而且病一病只係感冒，其實大家唔駛咁健康卦？佢正正就係捉住香港人怕死同懶乾淨既特質，每日潛移默化令到每一位都慣左帶口罩，洗19次手，係咁卒爛隻手維止，唔洗手食野係咪會馬上七孔流血？搞到個數字偏低左好耐，宜家好多人見到高左少少就世界末日咁，認為出街好危險，唉（我身邊十個都係咁，踩中你唔好意思，但我真心覺得呢個習慣係戇9，sorry）。  

但係，你都要望下佢呢啲政策同人哋地方啲政策架。有得選擇既話，其實係會選擇唔黎或者離開囉。 

外國新公司冇興趣黎香港set up，因為咁既地方冇人想黎 - fact； 

外國現有公司喺香港留唔到人，因為有得揀既話都唔想留喺呢度，每次離境回港又要坐監又要呢樣果樣，點返去搵屋企人呀 - fact； 

以前就話要望大陸market大，條數要跑跑跑。而家個國家聲名遠播。我都唔夠膽話邊個啱邊個錯，但係人哋寧願唔同大陸做生意囉 - fact ;
望返上大陸，話要背靠佢呀嘛。但係大陸呢兩年做過啲咩？除左每日輸入所謂人才，我睇唔到佢做左啲咩幫手 - fact； 

再望埋自己，收緊呢樣收緊果樣，全部自殘手段。食市、零售、服務、旅遊業全線企左喺度。先禁夜市，再變二人，不如出街帶電單車頭盔好冇？ 其實點解要咁？件事已經超越左佢講所謂咩保護咩防疫，我真心覺得佢係另有企圖。

更諗唔明既，係無差別地整死呢度。我嘗試俾benefit of doubt佢，但係客觀事實層面上我實在說服唔到自己話佢係幫緊香港囉，或者我真係太蠢。  

設計對白就會係：「係呀，我要整死呢度，令到你哋生不如死，快啲走走走⋯⋯頂，仲唔肯走？我再整死多啲，你捨得死心未？⋯⋯仲未？我再整死多啲。玩完架喇，醫返都有排搞，捨得躝未？」

Ok喇，咁為咩先？我當你靠祖國，祖國又唔照你；我當你要外資，人哋又撤離緊；我當你要民意，啲政策又冇人鐘意。當佢為自己喇：一己私慾想報復個社會？但係連支持佢既人都受既架喎；有人俾order要佢整死呢度？咩唔係要俾全世界睇自己當家作主會做得有幾好架咩，唔通咁樣叫做好咩？洗太平地再重組過成個地方？咁不如再凶狠啲直頭買埋機票叫啲人走啦，去到咁盡都唔差在啦，橫掂大家都篤眼篤鼻。  

對唔住，我諗唔明。其實，「果位阿姐究竟想點？」