【國際運動場：讀者分享 ⚽️🇧🇷🇵🇹🇯🇵】 為何巴西、葡萄牙、日本足球有特殊關係？ (Patreon)

沈教授及各會員，我哋又見面了。

上期講法國好多人才嚟自四方八面，但又有太多天賦球員喺法蘭西國家隊無位踢，然後代表其他國家。今次我哋講下分別位處三個洲嘅三個國家：巴西-日本-葡萄牙，佢哋嘅人係互有交流的，三大洲的足球三國誌。巴西、葡萄牙同日本喺國際關係上，大家有冇諗到有乜連結點呢？

我先講下葡萄牙同日本連繫先。

葡萄牙喺大航海時代（15世紀）已經到達日本，耶穌會（天主教會）教士甚至開始喺日本傳教。當時織田信長睇中葡萄牙嘅先進武器（火繩槍及大炮），就允許傳教，以換取武器貿易（講多少少：織田係唔like佛教，所以都有啲想用天主教作抗衡）。咁貿易唔止武器的，仲有好多商品，其中一樣就係奴隸。葡萄牙喺日本「購入」日本女性，有啲甚至賣到葡萄牙本土作妓女。大家有去過澳門大三巴教堂，會知道係葡萄牙統治澳門好早期已經起好。呢度都同日本好有關連的，喺江湖幕府時期嘅禁教令（禁天主教及基督教）下，有一日本批殉道者葬喺大三巴教堂，及有好多日本信徒係逃亡到澳門的。各位有機會去輕井澤的話，嗰度又係以前天主教徒嘅集中地，所以現代有唔少香港人去輕井澤舉行婚禮的。

咁葡萄牙同巴西就更加唔使講啦，喺大航海時代，葡萄牙都有殖民國家及地方，不過因為本身實力一般及管理不善（同某航空公司一樣），殖民地較少及範圍細啲，葡萄牙多拎港口做根據地（果阿、澳門、東帝汶等），國家就有巴西、莫桑比克、安哥拉等。葡萄牙可以搶到巴西做殖民地，都關天主教事，當時同西班牙爭奪大西洋航線及美洲土地，嘈到去教皇阿歷山大六世度，教皇就喺地圖畫咗條線，分辨出航海路線。喺中南美洲地區只係得巴西係講葡萄牙文就知乜事（其餘講西班牙文）。葡萄牙以前係巴西宗主國，喺19世紀有葡萄牙王室逃難到巴西，甚至Pedro一世到巴西搞獨立，令葡萄牙失去呢個殖民地。

咁巴西同日本有乜關係呢？巴西人口入面有200萬係日本人血統，大家會問點解會咁嘅？第一批大量日本人移民到巴西約喺1908年，1900年代大家係咪睇到啲端倪呢？就係當時日本軍國主義。造就日本帝國主義其中一個原因，就係當時日本人口稠密但本土資源唔夠分配，所以令到日本各方政治大佬實行殖民主義。當中有西鄉隆盛主張侵犯朝鮮主張，亦有關東軍的滿州殖民政策，亦有進犯俄羅斯嘅方向（喇叭牌征露丸就係嗰陣時發明出嚟）。大東亞共榮圈固然係其中一個可能性，咁都有啲無咁暴力方法去解決勞動力過剩。當時巴西有大量農地，需要大量人手。所以有一批日本人遠洋尋夢，然後落地生根。

講完呢三個國家歷史上嘅關係，去返足球上面。

日本足球起飛喺90年代，當時都借用外國勢力去加強實力，有瑠瑋同呂比須兩位入藉球員，佢兩個喺日職初期都算有實力一批。之後仲有三都主入藉兵踢過2002、2006年世界盃。咁我之前講話有一批日裔巴西人，佢哋後代出過一位日本國腳：田中鬥莉王出生於聖保羅市，本身唔識日文的，不過好波就係王道，加上有大和血統，佢位置喺中堅，兼踢過2010世界盃。葡萄牙國家隊好早就有殖民地球員代表出賽，最出名就係「獵豹」尤西比奧（莫桑比克人）。

但二戰後解殖運動後，好多球員都選擇原生國家出戰。丙朗其實都唔係葡萄牙本土出生的，佢嘅家鄉喺大西洋的海外島，叫馬德拉島（Madeira），距葡萄牙里斯本約成千公里遠。而巴西人代表葡萄牙踢波嘅就有Deco、Pepe比較出名，暫時有6位巴西人為葡萄牙國家隊比賽。反而葡萄牙人就暫時無反向輸出⋯⋯

今期又係講住咁多，下期繼續同大家交流。

▶️ C朗效應：沙特聯賽瘋狂天價買大量球星，與沙特王儲MBS的「大國崛起」戰略
https://www.youtube.com/watch?v=1mSgJvH6l7Q