【國際運動場：讀者分享 🇰🇵】 不為人知的跆拳道：北韓如何利用跆拳道作為「外交活動」 (Patreon)

【按：一位有心會員希望匿名分享以下故事，非常有趣，也非常合時。】

近期嘅間諜案件，令小弟諗起關於一個好少人提過嘅一個角度同角色，而由於知道相關故事嘅人，隨住歲月可能越嚟越少。小弟不才，好多相關資訊都係聽過同睇過，但未必搵到更有力嘅第三方證據去證明，所以有可能資料上有遺缺，還請教授同各位讀者一齊補充分享。

好多人都無為意，其實跆拳道對於北韓嚟講，係一個好特別嘅外交甚至間諜存在。

首先要好簡單交代一下跆拳道嘅歷史背境。本身跆拳道隊係韓國國軍編制下嘅「第二十九師團」，駐守濟州，主要嘅目的就係練習徒手搏擊武術，所以好多跆拳道嘅相關人物，都係同軍隊有關。

而跆拳道始創人，被稱為韓國國軍創建者之一嘅崔泓熙將軍，除咗負責係軍隊教授武術以外，亦都可能因為基於佢英文系畢業，所以係1962年被派到韓國駐馬來西亞大使館（當然亦有講法係指崔將軍同總統朴正熙不和所以被流放東南亞。當時實際職銜唔肯定，但普遍都指佢係駐馬大使）。之後就係1966年，係當時嘅漢城成立咗有九個國家代表嘅「國際跆拳道聯盟」。

係跆拳道嘅宣傳入邊，「國際跆拳道聯盟」係經常被提住「韓國第一個國際組織」，係一種軟實力嘅表現，代表韓國有一樣嘢可以話到事，影響到世界。

而值得留意嘅係，呢個時候嘅跆拳道人，包括崔將軍，仍然係代表緊「南韓／大韓民國」。

及後，崔將軍同朴正熙不和升級，朴正熙指派當時係佢身邊工作，同樣都係軍人出身嘅金雲龍，先由擔任大韓跆拳道協會主席開始，繼而成立一個全新嘅跆拳道組織「世界跆拳道聯盟」，取代由崔將軍擔任主席嘅「國際跆拳道聯盟」。

崔將軍亦都因為咁，就轉咗去加拿大定居，繼續推廣由佢創立嘅跆拳道，但基於朴正熙拎住國家資源去推廣、搶奪跆拳道嘅話語權同代表權，所以相對之下，國際跆拳道聯盟嘅發展變得相當艱難。

而就係八十年代，金日成政權邀請崔將軍到北韓發展跆拳道。當時崔將軍抵達平壤嘅時候，係由金日成親自接機，可見成件事嘅重要性「並不單純」。

（https://youtu.be/8ltiaDKPUBw?si=GtAr6pRmYfnXruDj&t=2272）

先點出一個「特別」嘅情況，係呢個時候，國際跆拳道聯盟嘅教練，特別係一班韓國人，係持有北韓以外嘅護照，可能係移咗民定咗居係唔同地方嘅該國護照（加拿大、英國、法國、馬來西亞等等），更甚至係原本就擁有外交優待嘅南韓護照。

（https://youtu.be/8ltiaDKPUBw?si=UMwY9xFpDQsdEDqt&t=2107，一位跆拳道教練由外交部係護照注明係跆拳道教練）

相對於北韓護照持有人，呢班跆拳道教練係外地係變咗係一個特別嘅特權。因為佢哋唔止可以自由出入其他國家，更加可以直接出入北韓，同北韓有聯絡。

依家由北韓管理嘅國際跆拳道聯盟，總部嘅通訊地址係維也納。當年崔將軍過身後，國際跆拳道聯盟分裂咗幾派，而呢個總部地址，成為咗其中一單法庭案件（基本上就係爭產案），根據法庭文件披露，呢個物業係由平壤政府持有，所以最終判咗比北韓管理嘅國際跆拳道聯盟。換言之，呢個地址，其實都屬於「北韓駐外機構」嘅另一種體現。

而點解睇到間諜案會諗起跆拳道呢？沿於一篇訪問。訪問原文我搵咗好耐都搵唔返，訪問係出自於一份南韓媒體，大概係2007/08年左右，訪問崔將軍嘅仔，崔重華總裁。當時崔重華代表「正統跆拳道傳人」返到南韓，聞說其實呢件事唔係普通一個旅客過境咁簡單，因為對於南韓嚟講，呢個人係曾經自由出入北韓嘅人，佢老豆更加係金日成重視嘅人，所以都係花咗一段時間先可以成功令佢入到境。而更重要嘅係，係訪問入邊，崔重華本人就承認，佢係曾經接受過北韓指示執行暗殺南韓總統全斗煥嘅任務。

當然，實際情況係點已經無從䅲考，雖然好多人可能都好難想像跆拳道有咁嘅能力，特別係今時今日大家見到嘅跆拳道，係朴正熙政府純粹基於政治立場去改頭換名嘅跆拳道，一種為咗推廣到奧運會嘅運動項目。但係跆拳道本身，不論兩韓，甚至其他國家，都係一度視為實戰程度好高嘅武術，例如台灣國軍嘅「莒拳隊」，本來就係因為蔣經國認為跆拳道作戰能力高，引入到國軍訓練嘅武術。

而有關北韓同跆拳道嘅發展故事，好多都明顯地有政治互動嘅成份係入邊，不過今篇主要係想提起一種特別嘅外交模式，如果大家有興趣聽其他相關故事，或者有其他資料同角度嘅補充，都可以留言交流，希望日後可以同大家分享更多。

▶️ 蕭少滔：如果金將軍擁有「北韓香港」：新義州特區難產，因為中國害怕北韓強大？
https://www.youtube.com/watch?v=UNuHvttCnsQ