【讀者分享⚽️🇮🇹】 意大利的足球地緣政治 (Patreon)

沈教授及各位會員好，又係我呢位白丁吹下水，講下足球界嘅國際關係。今次只講一個國家～意大利。我哋就睇下一個有濃厚歷史嘅國家，又點樣起起伏伏。

意大利足球就似羅馬帝國咁，有輝煌過，亦不斷有低潮出現，但直到現在都會隔一段時間奪冠。我哋拉長歷史長河睇，由第二及第三屆奪得世界盃冠軍，到1982及2006年奪魁，中間亦有1968、2020年歐洲國家杯冠軍，算穩定輸出。不過意大利足球就係同假波孖生兄弟咁，從未間斷「被揭發」，但又唔會認真去用「震盪療法」or「從根本去改革」，就似羅馬帝國咁不斷有危機，不斷用拉丁人方式去「解決」 。

現在我哋去意大利睇下佢哋聯賽有乜特別。意大利位處嘅地方就叫亞平寧半島，睇地圖就係一隻長靴型的狹長地帶。咁好多人都會話南北意大利存有好大差異，經濟、言語、文化及飲食等等，類似強囯南北不同調。我哋用首都羅馬劃一條線，就粗略分別南北(不過北意大利人係會覺得羅馬都屬於南意大利)。

意大利北部經濟及工業較強勁，單單法拉利（一陣又會講起佢）車廠總部喺馬拉內羅，及林寶堅尼在費拉拉省，意大利航空公司基地設於米蘭，就可見工業重鎮處於北部。意甲二十支球隊只有四隊位於意大利南部，可見球隊營運就係要靠經濟，所屬城市經濟差就搞乜都唔得，城市勁甚至可以容納兩支頂級球隊，好似米蘭市有國米同AC，都靈就有祖雲達斯及拖連奴，羅馬貴為首都，點衰都羅馬和拉素。

反而南方，香港人應該剩係識拿波里（老一輩多數為馬勒當拿）；有好多人都會混淆拿波里同安波里，英文一個叫Napoli、另一個就寫為Empoli（呢隊喺羅馬大區）。稍為資深球迷就會識多兩隊，一隊係巴里，另一支球隊係巴拉莫。南部以農業及旅遊為主要，意大利人會取笑南方人為鄉下佬（同廣東人叫其他省人做loud B一樣）。

講完意大利聯賽基本格局，我哋講下啲球隊背景。意大利球隊基本上係靠老闆養活的，唔似德甲會員制加董事局，又唔似英超以財團方式，同西甲會長制又有啲分別。老細一個人話哂事的，所以佢肯「科水」投資，球隊先有機會發圍。舉下例子：國米以前老細就係石油工業家族企業莫拉提父子掌控，阿爸掌政期間建立王朝，奪得無數冠軍；到細莫拉提嗰期好肯洗錢，不過就「運氣」麻麻，後尾人老咗就賣俾印尼財團，之後就到康寧集團。不過大家唔好以為康寧太子爺無點理隊波，其實佢幾上心，之前國米奪得聯賽冠軍，佢有同球員FaceTime兼講幾句意大利文。

同城另一支AC就喺六、七十年代輝煌後就沉咗好耐下，直到貝魯斯科尼（當時佢身份為傳媒大亨）收購球隊後，就再稱霸意甲、甚至歐洲。佢就係利用球隊提高知名度嘅高手，其後投入政壇，做埋總理執政（自稱中間偏右），不過佢揸莊期間，對意大利政局無乜建樹（都揸咗龍頭棍十幾年），反而桃色、貪污及整容新聞多人注意。之後又係到老賣盤，期間有強囯資本入主短時間，但現在由美帝財團持有。

首都嘅羅馬球隊現在係美國財團控制，之前由意大利家族擁有，又係老細足球。當時以托迪為戰術核心，斥巨資買入巴迪斯圖達、中田英壽等球員，集眾人之力，奪得一屆聯賽冠軍。之後又係燒錢熱情冷卻，賣盤俾美資財團。以上係意甲盛世發生喺所謂意甲七姊妹時期。其他拉素、帕爾馬、費倫天拿都係老闆足球，老細一唔玩就拜拜了。

祖雲達斯呢一隊就比較特別，到現在都係由Agnelli家族持有。其家族生意係快意車廠，可能其家族比較有長遠目光，佢哋球隊營運類似派一個家族成員（對足球有啲興趣嗰位）睇住盤數，然後用董事會去運作。有一點係同其他意甲球隊唔同，佢哋係唯二球隊有自己球場（另一隊係烏甸尼斯），意甲其他球隊就係「租用」該市政府球場。有自己球場，收入就一定好好多，又可以玩得持續發展啲。所以聯賽「應該」比較穩定。不過啲文or戲一用得「應該」呢啲字眼，就知會出事。出事喺莫吉嘅電話門假波案，令到球隊被罰降班。呢件事牽連甚廣，但最後此案一貫意大利風格完結，一個人孭哂，不過其他人無事（「發現到」假波一向係意甲傳統，三十年代開始到中間82世界盃後，再直到祖雲電話門呢單）。

輕輕講下拿玻里，呢支球隊本身有代表南方挑戰北方諸強使命感，由老馬年代兩奪意甲冠軍及首奪歐洲杯賽冠軍，到2023季相隔三十幾年再拎意甲冠軍，有一種南方人吐氣揚眉感覺。現在呢位老細係電影大亨，拍電影同搞球隊一樣燒錢，但一樣「洗到錢」，所以各位細想當中緣故。（本人去過意大利，消費時從無主動有商家給予收據，就知乜事）但呢位班主拎到冠軍又年事已高，熱情（錢）應該燃燒得差唔到，好快又易手了。

我哋以上可見意甲嘅發展由本地富豪家族擁有，過渡到外資財團介入。意大利十多年前已經係歐豬五國之一，當時本地資本縮水，加上全球化及其他國家狂印銀紙（其實得兩個國家狂印銀紙），熱錢要搵地方「投資」，不過暫未有中東有「興趣投資」意甲球隊。

反而有一隊球隊嘅運作模式比較特別，可以講一下，就係烏甸尼斯。由普素家族持有，其家族有「世界戰略視野」，喺英國購得屈福特，而西班牙就買咗格蘭達納。然後低價買入球員培養成材，高價賣俾其他球會。美其名三支球會互相「租借、買賣」球員，但明眼人就會聞得出呢種「近親繁殖」，會有洗錢嘅味道喺入面。

大家係咪覺得同另一啲財團所營運嘅全球不同地方都有球隊有啲似呢？例如鏝城背後嘅城市足球集團、某能量飲品嘅足球隊。搵錢嘅地方，就會引到好多人嚟「投資」，何況意大利被視入為進入歐洲（歐盟）最易國家之一，將來只會更加多不同勢力進駐亞平寧半島（想睇意大利人嚟緊點面對）。意甲聯賽再唔改變所有陋習，只靠「有心人」、「搵著數」去維持，只會沉淪落去。

PS：AC傳統上代表基層，國米就多中產多。佢哋就共用主場，國米主隊時就叫梅亞查，AC作東會叫聖西露（我實地去過，真係好舊不過幾宏偉）。講多一個同城球隊，羅馬同拉素，兩隊都係首都球隊，拉素喺政治上出名係乜？ 當然係右翼主義。佢哋啲極端球迷有一層法西斯主義喺心底，拉素隊徽嗰隻鷹表面上羅馬帝國昔日榮光，但大家熟讀歷史，就知納粹都係用鷹。咁呢隻鷹就算本身無咁嘅意思，喺有心人操弄下，就多咗一個暗示。最激一樣就係拉素球員迪肯尼奧入咗波曾經做出納粹手勢（之後就梗係罰停賽），而講起球員，拉素係比較少黑人球員。

▶️ 英格蘭打入足球決賽的政治意義：1966世界盃 Vs 2021歐國盃
https://www.youtube.com/watch?v=iDxSPrwscrQ