【讀者分享 🇺🇸💰】 回應中澳、中美關係：貿易逆差是怎樣造成的 (Patreon)

美國貿易逆差（經常帳逆差），同美國國庫債卷發行量，並沒有必然關係，更加唔係一個爛攤子。¹ 貿易赤字本身，並唔代表貿易本身公平與否，需要考慮生產國嘅動機及行為。

讀者文章之中，所提到「經濟學上的數學公式」，其實係國際貿易之中嘅Balance of Payment ²，當中分開經常帳（current account）及資本帳（capital+financial account）。而所謂凈出口國，係指該國出口總值，扣除進口總值之後係正數，即係貿易順差（紀錄於經常帳順差上），從順差所獲得嘅外匯，會於資本帳赤字顯示佢嘅流向。兩個帳目係分開統計，但係同一國家、同年度數字，大置上係一正一負嘅平衡。

以文章內所舉列嘅凈出口國，都透過貿易順差賺取外匯，流入美國國庫債卷。美國國庫債卷，好處在於市場夠大、流動性高、風險低，＿但係美債唔係唯一選擇＿。正常私企可以FDI，正常中國人會想盡辦法『潤』—連人帶錢走資 ³，中東佬投資體育洗白，連習近平都唔咁心於買美債、借錢畀美國政府，而選擇去好多流氓國家攪一帶一路，呢啲全部都會反映於相關國家資本帳赤字。

此外，各國嘅Balance of Payment，都存在『三角債』嘅關係；中國對美國出現經常帳順差嘅同時，美國對澳洲係有順差 ⁴，中國對澳洲係逆差︰攏統而言，响經常帳，中国欠澳洲、澳洲欠美國、美國欠中国，而資金流向於資本帳填數（述語上唔正確，但咁講容易啲去明白）。呢度只係簡單舉例，澳洲經貿總額，遠遠比唔上美中兩國，但係呢個三角債關係，係存在於環球各國嘅貿易及資金往來，唔應該只係睇雙邊質易。

講起澳洲對中国有經常帳順差（貿易順差為主），你以為澳洲政府、以至澳洲人，會揸人民幣債卷嗎？此外，好多呢啲外匯，跟住就係去咗派息畀美國及其他國家嘅FDI及 portfolio investment啊。澳洲因為儲蓄率低，依賴海外投資，令整體資本帳出現順差，倒過來就係整體經常帳逆差… 有人覺得你個國家值得投資，點會係爛攤子呢？

同意關稅並不一定係保護主義，Paul Krugman早十幾年前已經提出中国貨幣操控，應以關稅制裁。美國對發展中國家嘅補貼性經濟政策（匯率操控或直接補貼），一般都隻眼開隻眼閉，雖然美國藍領受害，但係消費者亦同時得益。但係當該國家展示敵意，美國亦毫不手軟去對付，80年代嘅日本就係好例子。美國近期一系列政策，已經係大國博奕，唔多講。

¹上世紀後半，於美元唔再同黃金掛勾之後，有一個Twin Deficit Hypothesis，來自 GDP數式重整，指稱財政赤字與經常帳赤字一同出現。老實講，除咗响課本教導算式重整嘅演譯，過去廿年都未有再聽過。

² https://www.rba.gov.au/education/resources/explainers/the-balance-of-payments.html

³ 潘石屹已經完美示範

⁴ 所以當特朗普就任總統初期，以經常帳赤字等同貿易不公平（謬誤），向加拿大、墨西哥開刀，重新談判北美自由貿易協議之時，佢又打電話嚟澳洲，要取消簽訂十幾年嘅貿易協議，當時澳洲首相譚保反問一句：「澳洲係逆差一方啊，求求你唔好攪我哋澳洲人啦！」

▶️王毅訪問澳洲宣告「一切如常」，真的嗎？
https://www.youtube.com/watch?v=VOhFyI1OC8s